“ઘાયલ હું, ઇસ લિયે ઘાતક હું”
વાહ !!!!
એક એવો ડાયલોગ જે આખી ફિલ્મનો સારાંશ છે . ફિલ્મ જોતા જ દિલની અંદર ઊંડે સુધી અસર કરે એવો આ ડાયલોગ છે.
નાગરિકોની વિશ્વસનીયતા અને જીવની સુરક્ષા જાળવવા માટે કંધાર હાઈજેકના આતંકવાદીઓને છોડવા પડ્યા એ ભારતની મજબૂરી હતી પરંતુ ત્યારબાદ ઘરમાં ઘૂસીને બદલો લેવાની ભારતની હિંમત અને ક્ષમતા એ સરકારની મજબૂત ઇચ્છાશક્તિ અને રાષ્ટ્રપ્રેમનું પ્રતિબિંબ છે.
ફિલ્મ જોતા જ ભારતીય સુરક્ષા એજન્સીના વફાદાર એજન્ટ્સ માટે માન આપોઆપ બે ગણું થઈ જશે. વિદેશી ધરતી પર અસહ્ય પરિસ્થિતિઓ વચ્ચે ભારતીય જાસૂસો કેવી રીતે પોતાની પકડ મજબૂત રાખે છે અને દેશની સુરક્ષા માટે સતત સંઘર્ષ કરે છે તે દ્રશ્યો અત્યંત અસરકારક રીતે રજૂ કરવામાં આવ્યા છે. પોતાની આંખો સામે પોતાની જ ટીમના સાથી પર શારીરિક અત્યાચાર થતો હોવા છતાં પથ્થર દિલ બની, મક્કમ મનોબળ અને બદલો લેવાની ક્ષમતા જાળવી રાખવી "આ કોઈ કાયરનું કામ નથી."
પ્રથમ નજરે આ દ્રશ્યો માનવતા મરી પરવારી હોય એવો આભાસ કરાવશે પરંતુ પરિસ્થિતિ અને કારણનું ઊંડું અવલોકન કરશો તો સમજાશે કે દુશ્મનનો મિત્ર બનીને દુશ્મનને જ ખતમ કરવાની રણનીતિ સામાન્ય વિચારશક્તિ કે ક્ષુલ્લક બુદ્ધિથી શક્ય નથી.
“યે નયા ભારત હૈ, જો ઘર મેં ઘૂસકર મારતા હૈ”લખવામાં અને વાંચવામાં સરળ તથા વોટ્સએપ સ્ટેટસ માટે આકર્ષક લાગતી આ લાઇનને હકીકતમાં અમલમાં મૂકવા માટે કેટલું સહન કરવું પડે છે, તેનો ખરો અનુભવ કરવા માટે આ ફિલ્મ એકવાર જોવી જ જોઈએ.
ફિલ્મમાં ભારતની રાજનૈતિક સ્થિતિને પણ સુંદર રીતે દર્શાવવામાં આવી છે. ડિપ્લોમેટ્સ અને ઇન્ટેલિજન્સ એજન્ટ્સ દ્વારા આપવામાં આવતી માહિતી ને હલકી રીતે લેવાથી કેટલું ગંભીર નુકસાન થઈ શકે છે તે બાબતને ખૂબ સરળ અને સ્પષ્ટ રીતે સમજાવવામાં આવી છે.
આ દેશના સૈનિકો અને પોલીસ તો વંદનને પાત્ર છે જ, પરંતુ મારું અંગત મંતવ્ય છે કે
“હદમાં રહીને લડવું કરતાં, હદ પાર જઈને લડવું વધારે અતિ કઠિન હોય છે.”
ઇન્ટેલિજન્સ ઓફિસર્સ અને RAW ટીમ માટે તો સાષ્ટાંગ દંડવત કરવાનું મન થઈ જાય એવું આ એક શાનદાર મૂવી છે. આવી અસરકારક ફિલ્મ બનાવવા બદલ તમામ કલાકારો અને સર્જક ટીમને અભિનંદન.
સુરક્ષા એજન્સીઓની કાર્યપદ્ધતિ, ભારતની આંતરિક સુરક્ષા, આંતરરાષ્ટ્રીય સંબંધો, રાજનીતિ, તર્કશક્તિ અને રહસ્યમય બાબતોમાં રસ ધરાવતા દરેક વ્યક્તિએ આ ફિલ્મ એક વખત અવશ્ય જોવી જોઈએ.
✍️ ઉત્તમ ત્રાસડીયા ૧૪.૧૨.૨૦૨૫
